المفروض التقنية تساعدك، ما تكثّر عليك
سايكلز شركة سعودية، بديناها سنة 2021 على فكرة بسيطة: اللي يبني التقنية لازم يكون قريب من اللي يستخدمها، وحنا قريبين
وش نسوي
نسوي أدوات تكلمها بالعربي، مثل ما تكلم واحد تعرفه، وتخلص شغلك: تقرير، عرض، عقد، أرقام تحسبها، فكرة تبي تدرسها
من وين بدينا
سنة 2021 كنا نشتغل في الاستشارات والخدمات، شغل زين، بس يخلص ويختفي، وما يبقى منه شي لنا
بغينا نسوي منتجات، شي يبقى ويتطور ويستخدمه ناس ما نعرفهم
وقتها ما كان فيه شي اسمه (ChatGPT)، وما كان أحد يعرف وين رايح الذكاء الاصطناعي، بس كان عندنا إحساس واضح بالمشكلة: الكمبيوتر ذكي، بس ما تعرف تكلمه، لازم تتعلم لغة ثانية وتفكر بطريقته
وسألنا نفسنا: ليش؟ ليش ما تكلمه بطريقتك؟
اليوم نسوي هذا كل يوم، وهذا اللي كنا نبيه من أول يوم
ليش نبنيها هنا
كل الأدوات اللي نستخدمها جاية من برا، تعرف تستخدمها، بس ما تعرف تصلحها، وما أحد سألك وش تحتاج
حنا بنينا كل شي عندنا: السحابة، والمنتجات، واللغة اللي تفهمك
مو لأننا ضد أحد، بس لأن اللي يبني الشي هو اللي يعرف يطوره، واللي يعرف يطوره هو اللي يسمعك
كيف نشتغل
نحاول نخلي كل شي أبسط
البساطة صعبة، وأصعب شي في الشغل، بس كل ما بسطت أكثر، كل ما صار الشي أنفع
وإذا غلطنا، نعرف بسرعة ونصلح
الغلط بيصير، والمشكلة مو في الغلط، المشكلة في إنك تكتشفه متأخر
وين رايحين
نبغى نوصل لمرحلة إنك تلقى وكيل لأي شغلة، بسياقك وبلغتك، بدون ما تدور بين عشر أدوات وتجرب وتنقل
وأبعد من كذا: نبغى نشوف سعوديين يسوون شغل ما كانوا يقدرون يسوونه قبل سنة، مو لأنهم درسوا برمجة، بس لأنهم لقوا أداة تفهمهم
هذا اللي يخلينا نصحى الصبح
